الرئيسية » كتاب » سيدي أبو حسين عرق الحيا طق..!

سيدي أبو حسين عرق الحيا طق..!

قلم

ايمان عكور

قررت أن اوجه لك هاي الرسالة وأمري لله.. قد تغضب البعض وترفع درجة حرارتهم للمليون وتصيبهم باعراض كورونا جميعها من خوفهم على ممتلكاتهم ولا أقول أنفسهم..
لأنه عرق الحيا عندهم طق..!

لاسابيع والأردنيون الصغير قبل الكبير بحالة ذهول وخوف من ان يقترب الوحش الكوروني الصغير من بيوتهم ويسرق احبابهم..!
لاسابيع والوطن قاعد يقدم أجمل صور الحب لكل أردني من غير أدنى شرط.. إلا حماية كل واحد فينا.
ولاسابيع واحنا بننتظر.. أنه ينطقوا ابناؤه اللي بنوا ثرواتهم وقصورهم وحسابات بنوكهم الدسمة من خير هالوطن.. ينطقوا ويقولوا
لبيك يا أردن.. لعيونك يا أردن
لكن ما شفنا .. الا الأردني البسيط
المعلم.. والموظف.. والتاجر الصغير
همه اللي قالوا احنا بنسندك يا اردن
مع انه ما معنا الا القليل..
القليل اللي طلع اشرف مليون مرة من ملايين ومليارات رجالك اللي طول عمرك مخدوع فيهم.

سيدى ابو حسين
كورونا علمنا دروس كثيرة.. وأهمها خلانا نكتشف قديش رجالاته او اسمحلي اسميهم ( اشباه الرجال) ما بستاهلوا يكونوا بهالوطن..

نادينا عليهم بكل الطرق
بالكويس والعاطل.. حاولنا نخجلهم بلكي يزوقوا على حالهم عالاقل قدامك سيدي بعد ما طلعت وقلت للاردنيين كلهم.. الوطن أمانة بأيدينا جميعا…!
لكن.. وانت بتعرف
لا حياة لمن تنادي..!
بعضهم عارفين صار على حافة الزهايمر
والبعض الثاني اجهزة سمعهم تعطلت فجأة
والبقية.. درجة وقاحتهم فاقت الوصف

علشان هيك يا سيدي
بترجاك.. واعتقد كل اردني راح يوافقني
انه تفعّل بنود قانون الدفاع كلها
بلا استثناء..
مش بس حرب الدبابات والصواريخ هي الحرب
معركتنا اليوم مع كورونا.. هي اكبر حرب
وانت شايف الفاتورة عم تكبر وقربت تهد حيل الوطن.. وكل مواطن
إلا همه.. وكانه العرس عند الجيران.!
ترا سيدي.. راس المال جبان وما بعترف بالاوطان..!

ملايينهم لما الهم مصلحة.. بتطلع
ملايينهم.. لما في منصب او كرسي ببالهم، بتشتريه
ملايينهم بتطلع.. لما انت بعيد يا وطن

راح اسهلها عليك سيدي.
بعرف انه فنادق الخمس نجوم صارت بيت لاردنيين كثير منهم كان يحلم يدخلها..!
وبعرف انه الريتز كارلتون بعده ما جهز..!
وبعرف انه اصحاب السعادة مش متعودين على اقل من خمس نجوم ✨
علشان هيك.. بترجاك تستضيفهم كلهم بفندقهم المفضل، ترا مو بعيد عن الريتز، وتخليلهم طابق مخصص بين الأردنية المحجورين.. بلكي ومع اني مش كثير متفائلة، بلكي يستحوا على حالهم من الخوف طبعا.. ويفتحوا خزناتهم ويشتروا ما تبقى من حياتهم بالفلوس اللي اكثرهم سرقوها من هالوطن واهله..!
بترجاك سيدي.. لا تفشلنا
اللي بده حياته… يشتريها
واللي رافض.. خليه بضيافة البلد يتسلى يعد غنماته..!!
قلهم.. انه سعر جهاز التنفس صار 50 مليون
والعدد مش كبير
First come first served
لانه ولا مستشفى بالكرة الارضية راح تستقبلهم ولو دفعوا مليار.. طياراتهم الخاصة راح تصدي ووقت الشدة وحدها سيارة الإسعاف الأردنية اللي راح يتمنوها..!
معقولة يا سيدي.. ارواحهم تطلع رخيصة
ترا كل شي صار عادي بزمن الكورونا..!

صدقني سيدي..
حالة الطوارئ اللي احنا فيها بتعطي الوطن كل الصلاحية من دون اي شعور بالذنب..
خليهم يتعلموا.. انه مليارات الدنيا كلها ما بتسوى لحظة كورونا..!
خليهم يا ابو حسين ينرعبوا
وبلكي.. عرق الحيا اللي طق
يرجع يتصلح..!!

سيدي.. الشعب كله مستعد يزودك
بقائمة صغار البلد.. حتى نسهل عملية استضافتهم المجانية..!

#خليك_بالبيت
#كورونا

اضف رد

لن يتم نشر البريد الإلكتروني . الحقول المطلوبة مشار لها بـ *

*